Laburpena

Azterketa hau Gipuzkoako Foru Aldundiko Emakumeen eta Gizonen Berdintasunerako Organoak sustatu eta finantzatu du, «Zainketen inguruko sentsibilizazioaren eta haiei buruzko ezagutzaren hobekuntzaren bidez zainketen gizarte-balioa areagotuko duen eta, horren bidez, Gipuzkoako Lurralde Historikoan genero- eta erantzunkidetasun-ikuspegian oinarrituta zainketen demokratizazioan eta bidezko banaketan aurrera egitea ahalbidetuko duen proiektu bat diseinatzera eta garatzera zuzendutako laguntza teknikoaren» esparruan. Proiektuaren helburu orokorra da zainketei agerikotasuna ematea, herritarrak sentsibilizatu eta interpelatzearen bidez zainketen garrantzi eta balio soziala aitortzea, eta Gipuzkoan genero- eta erantzunkidetasun-ikuspegian oinarrituta zainketen demokratizaziorako eta bidezko banaketarako baldintzak sortzeko prozesuan laguntzea.<br><br>Testuinguru horretan, Gipuzkoako herritarrek mendekotasun-egoeran dauden pertsonen zaintzaren eta haur eta nerabeen hazkuntzaren inguruan duten pertzepzioari eta iritziari buruzko azterketa bat egitea proposatzen da, genero intersekzionalaren ikuspegitik abiatuta eta biztanleriaren lagin adierazgarri bati ordenagailuz lagunduta egindako telefono bidezko inkesta batean oinarrituta.